Воҳидҷон Авезов, офарандаи нақши яке аз ҷанговарон дар филми таърихии “Шоҳ Исмоили Сомонӣ” шаби гузашта, 16-уми октябр, дар садамаи нақлиётӣ ҷон бохтааст.

Хабари зимни садамаи нақлиётӣ ҷон бохтани Воҳидҷон Авезовро Диловар Сафаров, роҳбари “Dfilm” ва нафаре, ки ба таҳияи филми “Шоҳ Исмоили Сомонӣ” машғул аст, ба “Азия-Плюс” тасдиқ кард.

Манбаъ зикр кард, ки садамаи нақлиётӣ шаби гузашта дар роҳи Хуҷанд-Мастчоҳ рух дода, дар пайи он якҷо бо Воҳидҷон Авезов боз ду нафари дигар ҷон бохтаанд, аммо ҳувияти онҳо маълум нест.

Ҳамчунин, маълум нест, ки сабаби рух додани садамаи нақлиёт чист. Мақомот дар ин бора расман иттилоъ надодаанд.

Тибқи иттилои дастрасгардида, Воҳидҷон Авезови 36-сола сокини ноҳияи Мастчоҳ ва дар хонадон писари ягона будааст. Номбурда ба соҳибкорӣ машғул будааст. Ҷасади ӯро дар зодгоҳаш ба хок супориданд. Аз ӯ се фарзанд боқӣ мондааст.

Намогирифт

Ба иттилои Диловар Сафаров, Воҳидҷон Авезов ҳудуди якуним сол ин ҷониб якҷо бо 15 тан аз нафарони дигар, ки барои нақшофарӣ дар ин филм ҷалб шуда буданд, тамрин мекард. Онҳо ҳамагӣ қомати баланд доштанд ва дар филм нақши ҷанговаронро иҷро мекарданд.

Сабти филм ҳоло оғоз нашудааст ва номаълум аст, ки он кай пурра ба навор гирифта мешавад.

Дар Telegram, Facebook ва Instagram бо мо бимонед.