Дар радабандии нави ҷаҳонии шаҳрҳо - Oxford Economics Global Cities Index-2025, пойтахти Тоҷикистон - Душанбе миёни 1000 шаҳри ҷаҳон дар мақоми 683-юм қарор гирифт.

Тибқи радабандии беҳтарин шаҳрҳои ҷаҳон, ки аз ҷониби ширкати байналмилалии машваратии Oxford Economics нашр шудааст, бузургтарин шаҳри Қазоқистон - Алмато миёни шаҳрҳои Осиёи Марказӣ пешсаф гаштааст. Ин шаҳр мақоми 258-умро касб кардааст.

Шаҳри Алмато дар бахши “сармояи инсонӣ” натиҷаи махсусан баланд гирифта, мақоми 64-умро соҳиб шуд, ки мақоми онро ҳамчун маркази зеҳнӣ ва рушди баланди илму маориф дар минтақа таъкид мекунад.

Дар радабандии шаҳрҳои Осиёи Марказӣ пас аз Алмато Остана бо мақоми 276-ум ҷой гирифт, ки дар бахшҳои иқтисод ва сармояи инсонӣ нишондиҳандаҳои хуб дошт, вале дар бахшҳои муҳити зист ва сифати идоракунӣ баҳои нисбатан паст гирифтааст.

Тошканд мақоми 471-ум дар ҷаҳон ва мақоми севвумро дар минтақа гирифт, Бишкек дар мақоми 498-ум ва Ишқобод дар мавқеи 623-юм қарор гирифтанд.

Пойтахти Тоҷикистон, Душанбе, дар мақоми 683-юм қарор гирифт, вале зарфияту имконоти он барои беҳбуди ҷойгоҳҳои худ тавассути муосирсозии инфрасохтор, беҳтар намудани сифати идоракунии шаҳрӣ ва тақвияти сармояи инсонӣ махсус таъкид гардид.

Дар радабандӣ боз ҳам Ню-Йорк пешсаф аст. Пас аз он Лондон ва Париж қарор доранд. Дар даҳгонаи беҳтарин шаҳрҳо Сан-Хосе, Сиэтл, Бостон, Сан-Франсиско, Мелбурн, Сидней ва Токио шомиланд.

Ҳангоми радабандии шаҳрҳо панҷ ҷанбаи калидӣ ба назар гирифта мешавад: иқтисод, сифати зиндагӣ, муҳити зист, идоракунӣ ва сармояи инсонӣ.

Ёдовар мешавем, ки дар радабандии беҳтарин шаҳрҳои ҷаҳон барои мутахассисони хориҷӣ, ки Mercer соли 2024 таҳия кард, Душанбе мақоми 216-умро гирифт. Ҳангоми таҳияи ин раддабандӣ сифати зиндагӣ, инфрасохтор, маориф ва арзиши зиндагӣ ба назар гирифта мешавад.

Дар Telegram, Facebook ва Instagram бо мо бимонед.