Душанбе. 20-уми апрел. ОИ «Азия-Плюс» - Ҳафтаи гузашта дар машқгоҳи низомии Фахробод таҳти унвони «Норак – Антитеррор» тамринҳои дурӯзаи воҳидҳои махсуси низомии кишварҳои узви Созмони Ҳамкории Шанхай муваффақона ба анҷом расиданд.

Чӣ тавре ки сардори маркази матбуоти Вазорати мудофиаи ҶТ Фаридун Маҳмадалиев ба ОИ «Азия-Плюс» хабар дод, тамринҳо дар ду марҳила баргузор шуда, дар он гурӯҳҳои фаврӣ ва воҳидҳои таъиноти махсуси Қувваҳои Мусаллаҳи Тоҷикистон, Қазоқистон, Қирғизистон, Русия ва Чин бо шумули ҳазор нафар сарбозу афсар ширкат варзиданд. «Дар тамринҳо аз қувваҳои низомии дифои ҳавоӣ, техникаи зиреҳпӯши вазнин ва аслиҳаву муҳимоти гуногун истифода карда шуд», - гуфт ӯ.

Номбурда афзуд, ҳадаф аз баргузории тамринот – ноил гардидан ба роҳандозии амалиёти муштарак баҳри дифоъ аз марзи давлатӣ, боздошти ҳавопаймои марзшикан, озод кардани шахсони гаравгонгирифиташуда ва нест кардани гурӯҳҳои террористии ба қаламрави кишварҳо воридшуда мебошад.