Душанбе. 20-уми апрел. ОИ «Азия-Плюс» - Имрӯз ҷиҳати анҷоми сафари кории дурӯза ҳайати Ассамблеяи парлумонии Созмони Аҳдномаи Атлантикаи Шимолӣ (НАТО) таҳти сарварии Дабири кулли он – Дэвид Хоббс ба шаҳри Душанбе меояд.

Чӣ тавре ки аз Вазорати умури хориҷии ҶТ ба ОИ «Азия-Плюс» хабар доданд, дар ҷараёни сафар дидору гуфтушуниди ҳайат бо мақомоти раҳбарии ҷумҳурӣ, раисони палатаҳои парлумон, роҳбарони вазорату идораҳо дар назар аст.

Интизор меравад, ки дар дидору гуфтушунидҳо вазъи кунунӣ ва дурнамои ҳамкориҳои дуҷониба, масоили марбут ба истифодаи захоири обиву энергетикӣ, таъмини волияти қонун, дифоъ аз ҳуқуқи инсон, мушкилоти мавҷудаи ҳамкорӣ ва амнияти минтақавӣ, таҳкими марз, вазъи мубориза бо муомилоти ғайриқонунии маводи мухаддир ва вазъи Афғонистон мавриди баррасӣ қарор хоҳад гирифт.