Душанбе. 6-уми май. ОИ «Азия-Плюс» - Тоҷикистон аз 1-уми май воридоти барқи Туркманистону Ӯзбекистонро қатъ сохт. Қатъи воридоти нерӯи барқ аз ин кишварҳо ба беҳ шудани вазъи таъминоти нерӯи барқ дар дохили ҷумҳурӣ вобаста аст ва феълан ҷумҳурӣ имкон пайдо кард, ки аҳолӣ ва корхонаву муассисаҳоро мустақилона бо нерӯи барқ таъмин созад. Дар ин бора ба ОИ «Азия-Плюс» аз ШСХК «Барқи тоҷик» хабар доданд.

Бино ба иттилои манбаъ, аз 1-уми ноябри соли 2008 то 1-уми майи соли ҷорӣ аз Туркманистон тавассути низоми энергетикии Ӯзбекистон ба ҷумҳурӣ 1,072 млрд. кВт/соат нерӯи барқ ворид шудааст. Тибқи қарордоди соли 2007 миёни Тоҷикистону Туркманистон, Туркманистон ӯҳдадор шуд, ки то соли 2012 дар мавсими тирамоҳу зимистон ба Тоҷикистон дар ҳаҷми 1,2 млрд. кВт/соат нерӯи барқ интиқол диҳад, вале бо сабабҳои маълум интиқоли он дар моҳҳои-ноябр-декабри соли гузашта 400 млн. кВт/соатро ташкил дода, интиқоли минбаъдаи он танҳо 27-уми феврали соли ҷорӣ барқарор гардид.

Дар ҳамин ҳол, аз 27-уми феврал то 1-уми май ба Тоҷикистон 251 млн. кВт/соат нерӯи барқи Ӯзбекистон интиқол дода шудааст, ки тибқи қарордод, он бояд 300 млн. кВт/соатро ташкил медод. «Акнун Ӯзбекистон 50 млн. кВт/соат қарзи боқимондаашро бояд тирамоҳ ба Тоҷикистон баргардонад», - гуфт ӯ.

Зикр гардид, ки Тоҷикистон аз 1-уми май интиқоли нерӯи барқ ба Қазоқистонро оғоз намуд. «Дар мавсими зимистон мо аз Қазоқистон 88 млн. кВт/соат нерӯи барқ гирифта будем ва шурӯъ аз 1-уми май ҷиҳати ҳисоббаробарӣ кардани қарз ба ин кишвар ҳамарӯза 5 млн. кВт/соат нерӯи барқ интиқол медиҳем», - афзуд манбаъ.