Душанбе. 4-уми май. ОИ «Азия-Плюс» - Дар ноҳияи наздисарҳадии Панҷ ба фаъолияти гурӯҳи қочоқбари фаромиллӣ, ки ба муомилоти ғайриқонунии маводи мухаддир машғул буд, хотима дода шуд.

Тибқи иттилои расида ба ОИ «Азия-Плюс» аз Вазорати умури дохилии ҶТ, рӯзи 1-уми май дар ноҳияи Панҷ автомашинаи навъи «Volkswagen Passat»-и ба сокини ноҳияи Ҷалолиддини Румӣ - Маҳмуд Шарифов таллуқдошта боздошт гардида, аз дохили он 31 килову 437 грамм маводи афюн дарёфт ва мусодира карда шуд. «Зимни баргузории амалиёти фаврӣ-ҷустуҷӯии минбаъда ба гумони даст доштан дар ин амал шаҳрванди Афғонистон Исломуддин валади Хоҷабой ва шаҳрванди Туркия Убайдулло Чақар низ боздошт шуданд», - гуфт манбаъ ва афзуд, ки гузашта аз ин, чанде баъдтар дар манзили истиқоматии М.Шарифов туфангчаи навъи «ТТ» низ дарёфт шудааст.

Аз рӯи ин далелҳо парвандаи ҷиноӣ боз гардида, корҳои тафтишотӣ идома доранд.