Душанбе. 4-уми май. ОИ «Азия-Плюс» - Чанде қабл дар вилояти Бадахшони Афғонистон, ки бо Тоҷикистон ҳаммарз аст, барои убури ғайриқонунии марзи давлатӣ 12 нафар шаҳрванди тоҷик боздошт гардид.

            Тибқи иттилои расида ба ОИ «Азия-Плюс» аз мақомоти қудратии кишвар, рӯзи 1-уми май ду оилаи тоҷикистониён аз ноҳияи Ашт тавассути ноҳияи Шӯрообод вориди Афғонистон мешаванд. «Онҳо 14 нафар будаанд, вале ба ду нафар муяссар мешавад, ки аз пулиси афғон пинҳон шаванд», - гуфт манбаъ.

            Дар сомонаи Афганистан.ру гуфта мешавад, миёни боздоштшудагон се нафар зан ва се нафар кӯдакон ҳузур дошта, боқимонда мардони калонсол мебошанд. «Интизор меравад, ки рӯзҳои наздик боздоштшудагон ҷиҳати бозпурсӣ ба маркази маъмурии вилоят – шаҳри Файзобод мунтақил хоҳанд шуд», - омадааст дар иттилои сомона.