Душанбе. 2-юми май. ОИ «Азия-Плюс» - Дар шаҳри Маскав рӯзи 29-уми апрел дар чаҳорчӯбаи татбиқи барномаи имиҷии «Пешвоёни асри XXI » маросими супурдани ҷоизаҳои байнулмилалӣ баргузор шуд.

            Чӣ тавре ки роҳбари медиа холдинги « Tajinfo » Муҳаммади Эгамзод ба ОИ «Азия-Плюс» хабар дод, дар маросими тантанавӣ барои саҳми арзанда дар рушди зеҳнии ҷомеа ва комёбиҳои намоёни касбӣ ба рӯзноманигори шинохтаи тоҷик, сардабири рӯзномаи «Вароруд», публитсист ва нависанда Бобоҷон Икромов ҷоизаи «Хиради миллат» супурда шуд.

            Зимни супурдани ҷоиза зикр гардид, ки Бобоҷон Икромов дар рушди журналистикаи тоҷик, ташкили муҳити озодии баён ва фаъолияти матбуоти озод, ки нишонаҳои асосии ҷомеаи демократӣ мебошанд, саҳми арзанда дорад. Дар замони ифои вазифа ба ҳайси раиси Кумитаи телевизиону радиои ҶТ Б.Икромов бевосита дар раванди истиқрори сулҳ ва расидан ба ваҳдати миллӣ, инъикоси воқеъбинонаи муколамаи тоҷикон, ба ватан баргаштани гурезаҳо ва роҳандозии ҳаёти созанда дар ҷумҳурӣ нақши муҳим бозидааст», - афзуд Д.Эгамзод.