Душанбе. 30-юми апрел. ОИ «Азия-Плюс» - Чанд рӯз қабл дар Донишгоҳи Монтана, ки дар шаҳри Мизулии иёлати Монтанаи ИМА воқеъ аст, «Гӯшаи Тоҷикистон» боз гардид.

            Чӣ тавре ки мухбири ОИ «Азия-Плюс» дар ИМА хабар дод, дар гӯша намунаҳои маҳсулоти ҳунармандии мардуми Тоҷикистон ба маърази тамошо гузошта шудааанд, ки бозгӯи таъриху фарҳанг ва анъанаҳои неки мардуми кишвар мебошанд.

            Дар маросими ифтитоҳи гӯша сафири Тоҷикистон дар ИМА Абдуҷаббор Ширинов, ректори донишгоҳ Ройс Энгстр ва муовини ректор Меҳрдод Киа ширкат варзида, дар суханронии худ изҳор доштанд, ки ифтитоҳи гӯшаи мазкур ба шиносоии наздиктари донишҷӯён ва сокинони иёлати Монтана бо Тоҷикистон мусоидат хоҳад кард.

            Дар фарҷоми маросими ифтитоҳи гӯша аз ҷониби донишҷӯдухтарони Тоҷикистон, ки дар ин донишгоҳ таҳсил мекунанд, консерт намоиш дода шуд.