23 ноябр, соати 14:00 дар толори калони Иттифоқи нависандагони Тоҷикистон бо иштироки адибону ҳунармандон маҳфили ширу шакар ба муносибати 80-солагии шоири саршиноси тоҷик Бозор Собир баргузор мегардад.

Бозор Собир яке аз шоирони шинохтаи муосири тоҷик буд, ки пас аз чанд муддати беморӣ 1 майи соли равон дар синни 79-солагӣ дар яке аз беморхонаҳои шаҳри Сиэтли Амрико аз олам гузашт ва бо супориши Президенти Тоҷикистон Эмомалӣ Раҳмон тобути ӯ ба ватан оварда, дар оромгоҳи Лучоб ба хок супорида шуд.

Бозир Собирро аз шоирони насли нави адабиёти тоҷик медонанд, ки дар солҳои 1970-80-ум дар саргаҳи ҷунбиши бедорӣ қарор дошт ва аз маҳбубтарин шоирони тоҷики замони Шӯравӣ ба ҳисоб мерафт. Охири солҳои 80-ум ба сиёсат пайваст ва соли 1990 вакили Шӯрои олии Тоҷикистон интихоб шуд. Соли 1993 9 моҳ зиндонӣ шуд ва пас аз раҳоӣ ба Маскав ва аз онҷо ба Амрико кӯчид.

Соли 2013 бо даъвати Эмомалӣ Раҳмон ба кишвар омад ва гуфт, ки дигар дар Тоҷикистон хоҳад зист. Ҳар сари чанд вақт ба Амрико барои дидорбинии пайвандонаш мерафт.