Ширкати мушовирии Gruner Stucky (Швейтсария) ба корҳо оид ба таҳияи асноди асосноккунии техникӣ-иқтисодии НБО “Чарсем” (ноҳияи Шуғнон, ВМКБ) оғоз мекунад. Дар ин бора Вазорати энергетика ва захираҳои оби ҷумҳурӣ хабар медиҳад.

Гуфта мешавад, дар ин хусус миёни ҶСК “Помир Энерҷӣ” ва ширкати “Gruner Stucky” шартнома ба имзо расонда шуд. НБО “Чарсем” дар дарёи Ғунди ноҳияи Шуғнон бо иқтидори 14 мегаватт бунёд хоҳад шуд.

Ба иттилои манбаъ, НБО “Чарсем” аз ҷиҳати ҷойгиршавии ҷуғрофӣ мавқеи стратегӣ дошта, барои пайвасти минбаъдаи шабакаҳои асосии “Помир Энерҷӣ” ба шабакаи то ҳоло ҷудобудаи ноҳияи Мурғоб замина фароҳам меорад. Деҳаи Чарсем дар 75 километрии шарқи шаҳри Хоруғ воқеъ аст.

Ёдрас мекунем, ки айни замон дар ноҳияи Роштқалаъаи ин вилоят дар дарёи Шоҳдара неругоҳи барқи обии “Себзор” сохта шуда истодааст, ки иқтидори лоиҳавиаш ба 11 Мвт баробар аст.

Ҳамчунин дар дарёи Панҷ дар ноҳияи Рӯшон бунёди НБО “Санобод” дар назар буда, иқтидори лоиҳавии он ба 200 МВт баробар аст. Ин иқтидор 4 баробар зиёдтар нисбат ба иқтидори ҳамаи неругоҳҳои барқи обии амалкунанда дар қаламрави ВМКБ мебошад.

Тибқи маълумоти Вазорати энергетика, айни замон дар қаламрави ВМКБ 11 неругоҳи барқи обии хурд бо иқтидори умумии ҳудуди 45 МВт кор мекунанд.

Ба идораи низоми барқи ВМКБ, ки мустақилона аз системаи энергетикии Тоҷикистон фаъолият мекунад, дар асоси созишномаи консессионӣ бо ҳукумати Тоҷикистон то охири соли 2027 ширкати байналмилалии «Помир Энержи» машғул мешавад.

Дар Telegram, Facebook ва Instagram бо мо бимонед.