Суди ноҳияи Сино боз ду далели порагирии собиқ корманди Вазорати рушди иқтисод ва савдо Аскар Нурализодаро, ки чанде қабл ба 11 соли зиндон маҳкум шуд, исбот кард.

Бино ба иттилои дафтари матбуоти Прокуратураи генералии ҶТ, Нурализода барои ба барномаи давлатии маблағгузорӣ дохил намудани сохтмони гармхона дар ноҳияи Балхии вилояти Хатлон, ҳамчунин бунёди боғ дар ин ноҳия аз шаҳрвандон Д.Олимов ва Ш.Сангинов дар ҳаҷми 4 ҳазор доллар ва 25 ҳазор сомонӣ пора гирифтааст.

«Суд далели порагирии Нурализодаро аз шаҳрванд Н.Абдураҳимов, сокини ноҳияи Ҷалолиддини Балхӣ дар ҳаҷми 513 ҳазор доллар ва 32 ҳазор сомонӣ барои ба Барномаи давлатии сармоягузории солҳои 2016-2020 дохил кардани банди рушди парандапарварӣ дар ноҳия исбот кард», - таъкид мешавад дар маълумот.

Бино ба маълумоти Прокуратураи генералӣ, Аскар Нурализода санаи 28 сентябр дар пойтахт ҳангоми гирифтани 490 ҳазор доллар пора аз шаҳрванд Н.Абдураҳимов бо далели шайъӣ боздошт шуд.

Ёдрас мекунем, ки суди ноҳияи Сино Аскар Нурализодаро ба иттиҳоми якчанд далели порагирӣ ба 11 соли зиндони низомаш шадид ва маҳрум шудан аз ҳуқуқи ишғоли вазифаҳои роҳбарӣ дар мақомоти давлатӣ ба муҳлати 5 сол маҳкум кард.

Хабарҳои моро дар Telegram пайгирӣ намоед, ба шабакаи мо бо суроғаи  https://t.me/asiaplus  ҳамроҳ шавед.