Як мардро дар Душанбе бо гумони дуздии беш аз 350 ҳазор сомонӣ аз мағоза боздошт кардаанд.  Дар ин бора Раёсати ВКД дар Душанбе хабар дода, навиштааст, ки боздоштшуда Сафаров Рустам, сокини 38-солаи пойтахт аст.

Ба гуфтаи манбаъ, ин нафар рӯзи 5-уми ноябр пинҳонӣ ба мағозае дар кӯчаи Каринмани пойтахт даромада, аз дохили ҷевони оҳанин 220 ҳазор сомонӣ ва 13 ҳазору 700 долларро дуздидааст. Гуфта мешавад, ки баъди боздошт мақомот аз ӯ як қисми ин маблағро дарёфт ва мусодира кардаанд.

Дар айни ҳол пулис алайҳи Сафаров Рустам бо иттиҳоми дуздӣ (моддаи 244 қисми 4 кодекси ҷиноӣ) парванда боз кардааст. Бар асоси ин иттиҳом ба Сафаров аз 8 то 12 соли зиндон таҳдид мекунад.

Назари боздоштшуда ва наздикону пайвандони ӯ дар робита ба ин қазия маълум нест.

Дуздӣ дар Тоҷикистон аз маъмултарин ҷиноятҳоест, ки сари ҳар чанд вақт мақомот аз он хабар медиҳад. Чанде пеш Додгоҳи ноҳияи Хуросони вилояти Хатлон як мардро барои дуздии телефон аз масҷид се сол равонаи зиндон карда буд.

Дар Telegram, Facebook ва Instagram бо мо бимонед.