Аз 5 феврали соли 2025 дар Русия як қатор меъёрҳои нави қонунгузорӣ мавриди амал қарор мегиранд, ки бевосита ба муҳоҷирони меҳнатӣ дахл дорад. Дар ин бора «Парламентская газета», ки нашрияи расмии Маҷлиси федералии Русия аст, хабар медиҳад.
Мақомоти пулис метавонад дар бораи ихроҷи муҳоҷирон қарор қабул кунад
Қаблан қарор дар бораи ихроҷи муҳоҷирон танҳо аз ҷониби додгоҳҳо (судҳо) қабул карда мешуд. Аммо аз 5 феврали соли 2025 қонуни №248-ҚФ аз 8 августи соли 2024 ҳукми қонунӣ мегирад, ки ба мақомоти пулис чунин ваколат медиҳад. Ин қонун ба суръат бахшидан ба равандҳои ихроҷи шаҳрвандони хориҷӣ, ки қонунҳои Русияро риоя накардаанд, мусоидат мекунад.
Илова бар ин, дар қонун барои хидматрасониҳои тибқи қонунгузорӣ манъшуда ба муҳоҷироне, ки ба феҳристи шахсони таҳти назорат дохил шудаанд, ҷавобгарӣ пешбинӣ шудааст. Андозаи ҷаримаҳо чунин аст:
- барои шаҳрвандон – то 5 ҳазор рубл;
- барои шахсони мансабдор — то 50 ҳазор рубл;
- барои шахсони ҳуқуқӣ — то 500 ҳазор рубл.
Муҳоҷироне, ки бояд ихроҷ шаванд, наметавонанд дар Русия ақди никоҳ банданд
Тибқи қонуни №260-ҚФ аз 8 августи соли 2024, нисбати муҳоҷироне, ки дар кишвар бе асосҳои қонунии иқомат қарор доранд, реҷаи ихроҷ ҷорӣ карда мешавад. Илова ба ихроҷи маъмурӣ, ин шахсон боз бо як қатор маҳдудиятҳо дучор мешаванд:
Манъи бастани ақди никоҳ. Муҳоҷирони ғайриқонунӣ наметавонанд муносибатҳои худро расман дар Русия сабт кунанд.
Маҳдудиятҳо барои сабти номи тиҷорат. Ба онҳо соҳибкор шудан манъ карда мешавад.
Маҳдудиятҳо барои харидории молу мулк. Хариди амволи ғайриманқул, мошин ва дигар дороиҳо манъ аст.
Маҳрум шудан аз ҳуқуқи ронандагӣ. Натанҳо гирифтани шаҳодатномаи ронандагӣ, балки истифодаи он низ манъ мешавад.
Маҳдудиятҳо дар амалиётҳои молиявӣ. Кушодани суратҳисобҳои бонкӣ ва интиқоли маблағ имконнопазир хоҳад буд.
Маҳдудият дар ҳаракат. Шахсони таҳти реҷаи ихроҷбуда наметавонанд аз ҳудуди минтақа ё шаҳрдории муайян берун раванд.
Суҳбати видеоӣ барои адвокатҳо ва гумонбаршудагон
Гумонбаршудагон ва айбдоршавандагоне, ки дар боздоштгоҳҳои тафтишотӣ ва муассисаҳои ислоҳӣ (СИЗО, ИВС) қарор доранд, ҳуқуқи тамос гирифтан бо адвокатҳоро тавассути видеоконфронс пайдо мекунанд. Қонуни дахлдор №267-ҚФ аз 8 августи соли 2024 низ аз 5 феврал мавриди амал қарор мегирад.
Ин навовари барои осон намудани ҳамкории мутақобила байни адвокатҳо ва зерҳимояҳо пешбинӣ шудаанд, махсусан дар ҳолатҳое, ки вохӯрии рӯ ба рӯ душвор аст.
Чаро ин тағйирот муҳиманд?
Қонунҳои нав ба таҳкими назорати равандҳои муҳоҷират ва ҳифзи низоми ҳуқуқии Русия равона шудаанд. Онҳо барои касоне, ки меъёрҳои муҳоҷиратро риоя намекунанд, чаҳорчӯби қатъӣ ҷорӣ намуда, аммо дар баробари ин, барои ҳифзи ҳуқуқи гумонбаршудагон имкониятҳои иловагӣ фароҳам меоранд.
Барои муҳоҷирон ва онҳое, ки бо онҳо ҳамкорӣ мекунанд, ба инобат гирифтани ин тағйирот муҳим аст, то ки аз ҷарима ва дигар паёмадҳо эмин бимонанд.
Бояд гуфт, пас аз ҳодисаи "Крокус" дар Маскав фишору таъқиб ва боздошту ихроҷи муҳоҷирон дар Русия афзуд. Маҳз баъди ин ҳодиса мақомоти Русия ба маҳдуд кардани ҳуқуқи муҳоҷирон дар ин кишвар оғоз карданд.
Аз ҷумла давоми гузашта дар беш аз 10 минтақаи Русия корҳои гуногун барои муҳоҷиронро манъ карда, қонунҳои дигари ин кишварро пурзӯр карданд.
Соли 2025 барои муҳоҷироне, ки нияти кору зиндагӣ дар Русияро доранд, тағйироти зиёд мешавад. Шурӯъ аз ҳамин сол муҳоҷирони ғайриқонунӣ зери назорати қатъӣ хоҳанд буд, бинобар ин риояи ҳама қоидаҳои нав муҳим аст. Ин қоидаҳо кадомҳоянд? Дар ин мавод талош кардем, ки онҳоро муфассал шарҳ диҳем.
Руcский