Додгоҳи ноҳияи Синои пойтахт Баҳрулло Юсуфзода, ронандае, ки зери чархи мошинаш Ҷасур Акрамови 16-сола, сокини шаҳри Душанбе ҷон бохта буд, гунаҳкор ҳисобида, ба 10 соли зиндон маҳкум кардааст.

Дар ин бора Фирдавс Акрамов, падари марҳум ба “Азия-Плюс” хабар дода гуфт, ки ҳукм рӯзи 13-уми июн дар мурофиаи навбатӣ содир шудааст.

Додрас  Баҳрулло Юсуфзодаро бо иттиҳоми "вайрон кардани қоидаҳои ҳаракати роҳ ва истифодаи воситаҳои нақлиёт, ки боиси марги инсон мегардад” (қисми 4 моддаи 212 Кодекси ҷиноятии ҶТ) гунаҳкор ҳисобидааст.

Назари хонавода ва вакили дифоъи Баҳрулло Юсуфзода нисбат ба ҳукми додгоҳ маълум нест.

Қаблан Зарнигор Шоева, модари маҳкумшуда ба “Азия-Плюс” гуфта буд, ки “ҳамчун модар бо дарди хонаводаи марҳум шарик ҳаст, чун бо хатои фарзандаш ин ҳодиса рух дод”.

Ӯ афзуда буд, ки Баҳрулло Юсуфзода аз волидайни Ҷасур Акрамов узр хостааст.

Ин қазия замоне расонаӣ гардид, ки Фирдавс Акрамов, падари ноболиғ бо нашри як номаи саркушода ба унвонии Эмомалӣ Раҳмон, раиси ҷумҳури кишвар, Рустами Эмомалӣ, шаҳрдори Душанбе ва Ҳабибулло Воҳидзода, додситони кул хоста буд, ки парвандаи ҷиноии марги писарашро таҳти назорати шахсӣ гиранд.

Ӯ таъкид карда буд, ки падари муттаҳам корманди пулис аст ва аз рӯйи овозаҳо “ҳамаашро ҳал мекунанд, ҷазои вазнин намегиранд”.

Мурофиаи аввал дар доираи ин парванда рӯзи 2-юми июн дар Додгоҳи ноҳияи Сино оғоз шуда, рӯзҳои 3 ва 12-уми июн ду мурофиаи дигар баргузор шуд.

Бояд гуфт, ки садамаи нақлиётӣ бо иштироки Баҳрулло Юсуфзода рӯзи 3-юми апрел дар шаҳри Душанбе рух дод, ки дар натиҷа Ҷасур Акрамови 16-сола ҷароҳат бардошта, ҳангоми ба беморхона бурдан, ҷон бохт. Сабаби ҳодиса “аз уҳдаи идораи нақлиёт набаромадан”-и Юсуфзода гуфта мешавад.

Дар Telegram, Facebook ва Instagram бо мо бимонед.