Сардори Раёсати беҳдошти замин ва обёрӣ дар вилояти Суғд, ки чанде пеш аз сӯйи Оҷонсии зиддифасод ба азхудкунии беш аз 4 миллиону 386 ҳазор сомонии будҷа муттаҳам мешуд, бо қарори додгоҳи шаҳри Хуҷанд ҳудуди 137 ҳазор сомонӣ ҷарима шуда, аз ишғоли мансаб ба муддати ду сол маҳрум гардидааст.

Дар ин бора Сулаймон Султонзода, раиси Оҷонсии зиддифасоди кишвар дирӯз, 8-уми август дар нишасти матбуотӣ хабар дод.

Ӯ дар шарҳи ин қазия гуфт, Аминҷон Абдуллозода ҳамроҳи Рустам Баротов, мутахассиси ин раёсат, Дилшод Раҳматуллоев, як хешаш ва роҳбарони ширкатҳои хусусии “Ганҷ-Сохтмон”, “Пурмеҳр”, “Хонаи Дониш”, “Тибби замонавӣ” 4 млн 386 ҳазор сомонӣ пули таъмири пойгоҳҳои обкашии чанд ноҳияро бо роҳи азонихудкунӣ тасарруф кардаанд.

Ин маблағҳо барои таъмири пойгоҳҳои обкашии ноҳияҳои Зафаробод, Ашт, Спитамен ва Мастчоҳ барои солҳои 2023-2024 ҷудо шуда будааст.

Сулаймон Султонзода

Ба гуфтаи ин ниҳод нисбати Абдуллозода ва дигарон бо иттиҳоми азонихудкунӣ ё исрофкорӣ (моддаи 245 қисми 4 банди б,) ва “сохтакории ҳуҷҷтаҳо” (моддаи 340 қисми 2 бандҳои а, б)-и парвандаи ҷиноятӣ боз шудааст.

“Бо қарори додгоҳ, нисбати Аминҷон Абдуллозода, роҳбарони ширкатҳо Собиров, Раҳматов (номҳояшонро зикр накард) ҷазо дар намуди ҷарима ба андозаи 1900 нишондиҳанда барои ҳисобҳо, баробар ба 136 ҳазору 800 сомонӣ бо маҳрум кардан аз ҳуқуқи ишғоли мансабҳои роҳбарикунанда ба муҳлати ду сол татбиқ гардид.

Нисбати роҳбарони дигар ширкатҳо Ҳакимов ва Раҳимов (номҳояшонро зикр накард) ҷазо дар намуди ҷарима ба андозаи 2 ҳазор нишондиҳанда барои ҳисбҳо баробар ба 144 ҳазор сомонӣ бо маҳрум кардан аз ҳуқуқи ишғоли мансабҳои роҳбарикунанда ба муддати се сол татбиқ карда шуд. Баротов Рустам бинобар дар ҳолати ретситивии хавфнок содир намудани ҷиноят, 10 солу 6 моҳ аз зодӣ маҳрум шуд”,- гуфт Сулаймон Султонзода.

Вай афзуд, Аминҷон Абдуллозода дигар “дар ин мансаб фаъолият намекунад”.

Қаблан, Ҳалимҷон Ҳоҷиев, муовини сардори Раёсати беҳдошти замин ва обёрӣ дар вилояти Суғд зимни нишасти матбуотӣ гуфта буд, ки “Абдуллозода ҳоло дар озодӣ буда, аз пайи кору зиндагии хеш аст”.

Диловар Мирзоҳомидзода, раиси Додгоҳи шаҳри Хуҷанд дар нишасти матбуотии рӯзи 7-уми август дар шарҳи ин қазия гуфт, наздикони маҳкумшудаҳо аз болои ҳукми додгоҳ шикоят кардаанд ва парванда дар баррасии кассатсионии Додгоҳи вилояти Суғд қарор дорад.

Назари худи маҳкумшудаҳо, аз ҷумла Абудллозода дар робита ба ҳукми додгоҳ маълум нест.

Бояд гуфт, ки дар бораи иттиҳоми азхудкунии миллионҳо сомонии будҷа аз сӯйи Аминҷон Абдуллозода охири моҳи июл Оҷонсии зиддифасоди кишвар хабар дода буд. Ба иттилои ин ниҳод, маблағи 4 миллиону 386 ҳазор сомонии тасарруфшуда ба буҷети давлат баргардонида шудааст.

Дар Telegram, Facebook ва Instagram бо мо бимонед.