Вазири корҳои хориҷии Тоҷикистон Сироҷиддин Муҳриддин пешниҳод намуд, ки дар қаламрави вилояти Хатлон Маркази вокуниши гуманитарии Созмони Аҳдномаи амнияти дастаҷамъӣ (СААД) таъсис дода шавад.

Тавре ки ба “Азия-Плюс” аз Вазорати корҳои хориҷии ҷумҳурӣ хабар доданд, ин пешниҳод аз ҷониби ӯ имрӯз, 21 июн дар ҷаласаи Шӯрои вазирони корҳои хориҷии Созмон дар шаҳри Алмато садо дод.

Ба гуфтаи вазири корҳои хориҷии Тоҷикистон, фаъолияти Марказ ҷиҳати вокуниши фаврӣ ба таҳдиду чолишҳо ва буҳронҳои башардӯстона (гуманитарӣ) нигаронида хоҳад шуд.

Сироҷиддин Муҳриддин ҳамчунин аҳаммияти анҷоми ҷараёни чандинсолаи гутушунидҳо оид ба таҳияи Барномаи ҳадафноки байнидавлатӣ оид ба таҳқими сарҳади байни Тоҷикистон ва Афғонистонро таъкид дошта, ташаббуси ба имзо расонидани Қарори Шӯрои амнияти дастаҷамъии СААД-ро дар моҳи июли соли равон пешниҳод кард.

Вазири корҳои хориҷии ҷумҳурӣ ба мушкилоти тундгароӣ (радикализм)-и динӣ таваҷҷуҳи хосса зоҳир намуд.

“Барои минтақаи Осиёи Марказӣ ҷиддитарин таҳдид пешбурди афкору идеологияи тундгароии динӣ маҳсуб меёбад”, - иброз дошт ӯ.

Вазир инчунин доир ба зарурати коркарди ташаббус бобати роҳандозии системаи ҳифзи фазои иттилоотии СААД изҳори назар кард.

Ғайр аз ин, Сироҷиддин Муҳриддин омодагии Тоҷикистонро ба баргузории машқҳои муштараки “Рубеж-2024” бо иштироки воҳидҳои Неруҳои дастаҷамъии зудамали Созмон дар минтақаи Осиёи Марказӣ дар қаламрави ҷумҳурӣ изҳор кард.

Дар Telegram, Facebook ва Instagram бо мо бимонед.