Пагоҳ, 20-уми декабр “Тоҷикфилм” дар толори синамои ба номи Тоҳир Собиров питчинг-рӯнамоии лоиҳаҳои синамоӣ доир мекунад. Дар он лоиҳаҳои филмҳое, ки “Тоҷикфилм” дар соли 2025 сармоягузорӣ мекунад, интихоб мешаванд.

Дар ин бора “Тоҷикфилм” иттилоъ дода менависад, “лоиҳаҳои синамоӣ барои филми ҳунарии пурра, филми кутоҳи бадеӣ, филми мустанад ва филми тасвирӣ рӯнамоӣ мегарданд.”

Дар питчинг-рӯнамоии лоиҳаҳои синамоӣ филмсозон, намояндагони ширкатҳои филмбардорӣ ва шабакаҳои телевизионӣ, ки хоҳиши филмофарӣ доранд, иштирок карда метавонанд.

Толиб Раҳматуллоев, муовини директори “Тоҷикфилм” ба “Азия-Плюс” гуфт, то имрӯз лоиҳаи 8 филм ба ин муассиса ворид гардид.

“Мувофиқи “Барномаи рушди кинои Тоҷикистон барои солҳои 2023-2027” “Тоҷикфилм” дар соли 2025 ду филми ҳунарии пурра, 4 филми кутоҳи бадеӣ ва чанд (миқдори муайянро нагуфт-аз идора) филми мустанаду тасвириро сармоягузорӣ мекунад.”

Вале ӯ таъкид кард, ки ин теъдод ниҳоӣ набуда, метавонад дар ҳолати пешниҳоди лоиҳаҳои арзишманд филмҳои бештар сарпарастӣ ёбанд.

Аз “Тоҷикфилм” нагуфтанд, ки барои сарпарастии филмҳо дар соли 2025 чӣ қадар маблағ ҷудо шудааст ва барои ҳар як филм чӣ қадар сармоягузорӣ мешавад..

Натиҷаҳои интихоби лоиҳаҳо пас аз 10 рӯз тавассути шабакаҳои иҷтимоӣ ва сомонаи Муассисаи давлатии “Тоҷикфилм” расонаӣ мегардад.

Бояд гуфт, охирон маротиба “Тоҷикфилм” 30-юми августи соли 2024 рӯнамоии лоиҳаҳои синамоӣ доир карда буд.

Вазъи бахши синамо дар кишвар солҳои охир нигаронкунанда арзёбӣ мешавад. Мардум аз набудани филми арзишнок шикоят мекунанд, вале филмофарон аз бетаваҷҷуҳӣ ба синамо нигаронанд. Ба гуфтаи аксари филмофарон мушкили асосии ин соҳа маблағ аст, вале баъзе ҳунармандон изҳор медоранд, ки камбуди пул дуюмдараҷа буда, мушкили аввал набудани мутахассиси соҳа аст.

Аз мушкилоти соҳаи синамо ва андешаи мутахассисони соҳа дар маводи "Камбуди пул ё мутахассис? Чаро дар Тоҷикистон филми таърихӣ намеофаранд?" мутолиа кунед.

Дар Telegram, Facebook, Instagram, OK ва ВК бо мо бимонед.