Дар соли 2024 18 ҳазор муҳоҷир аз Тоҷикистон, Ӯзбекистон ва Қирғизистон аз шаҳри Маскав ихроҷ карда шудаанд, ки ин нисбат ба соли 2023-юм 6 ҳазор кас бештар будааст. Онҳо ҳақ надоранд, ки то 5 сол дубора ба Русия баргарданд. 

Дар ин бора хабаргузории “ТАСС” хабар дода, навиштааст, ки муҳоҷирон “барои вайрон кардани қоидаҳои вуруд ва иқомат дар Федератсияи Русия аз Москва хориҷ шуданд”.

“Дар соли 2023 ин шумора тақрибан 12 ҳазор нафарро ташкил дода буд”,-навиштаатс ин хабаргузорӣ.

Ба гуфтаи манбаъ, аз ҳама бештар шаҳрвандони Ӯзбекистон, Тоҷикистон ва Қирғизистон ихроҷ шудаанд. Дар байни онҳо шаҳрвандони кишварҳои Латвия, Фаронса ва Эстония низ ҳастанд.

“Ҳамаи хориҷшудагон аз ҷониби суд гунаҳкор дониста шуданд. Онҳо моддаи 18.8 Кодекси ҳуқуқвайронкунии маъмурии Федератсияи Русия (вайрон кардани қоидаҳои вуруд ё реҷаи иқомат дар Федератсияи Русия аз ҷониби шаҳрвандони хориҷӣ ё шахсони бешаҳрванд)-ро вайрон кардаанд”, - омадааст дар хабар.

Ҳамаи ихроҷшудагон наметавонанд дар муддати 5 сол дубора ба Русия баргарданд.

Қаблан, ин расона хабар дода буд, ки соли гузашта дар вилояти назди Маскав 5,1 ҳазор муҳоҷирро ихроҷ карда буданд.

Бояд гуфт, пас аз ҳодисаи "Крокус" дар Маскав, ки 4 шаҳрванди Тоҷикистон ҳамчун гумонбари асост дастгир гардиданд, фишору таъқиб ва боздошту ихроҷи муҳоҷирон дар Русия афзуд. Маҳз баъди ин ҳодиса мақомоти Русия ба маҳдуд кардани ҳуқуқи муҳоҷирон дар ин кишвар оғоз карданд. 

Танҳо дар моҳи октябр ба навиштаи расонаҳои русӣ панҷ лоиҳаи қонун ба Думаи давлатӣ ворид шудааст, ки будубоши муҳоҷиронро дар ин кишвар мушкил мекунад.

Вакилони Дума ислоҳотеро роҳандозӣ карданд, ки дарёфти иҷозаи иқомати доими Русияро тариқи издивоҷ бо шаҳрвандони ин кишвар маҳдуд мекунад. Ҳамчунин, дар ин кишвар низоми нави махсуси ихроҷи муҳоҷирон ҷорӣ шуд.

Ба иттилои расмӣ танҳо дар 6 моҳи соли гузашта 17 ҳазор шаҳрванди  Тоҷикистон аз Русия ихроҷ карда шуданд.

Дар Telegram, Facebook ва Instagram бо мо бимонед.