Аз моҳи августи соли 2025 дар Русия ба зангҳои овозӣ ва видеоӣ тариқи паёмрасонҳои "WhatsApp" ва "Telegram" маҳдудият ҷорӣ шуд. Ҳоло фиристодани паёмҳои матнӣ ва аксиву наворӣ фаъол аст, вале бисёр вақт зангҳо қатъ гардида, ҳангоми занг, овоз ва навор вайрону таҳриф ё умуман пайваст намешаванд.

Барои муҳоҷирони корӣ аз Тоҷикистон, ки барои гуфтугӯву тамос бо наздикону пайвандони худ тариқи ин паёмрасонҳо одат карда буданд, ин як мушкили ҷиддӣ аст. Вале барои занг ва суҳбати бемушкил  ҷойгузинҳои ин паёмрасонҳо мавҷуд аст.

 

Чаро ин тавр шуд?

Хадамоти федералии назорат дар соҳаи алоқа, технологияҳои иттилоотӣ ва иртиботи оммавии Русия (Роскомнадзор), ки ниҳоди назораткунандаи инетрнет дар ин кишвар аст, расман шарҳ дод, ки масъулини ин паёмрасонҳои хориҷӣ талаботеро, ки ба пешгирии истифодаи онҳо ба хотири терроризму ифротгароӣ (экстремизм) кумак мекард, иҷро накарданд. Ин ниҳод гуфт, ин тасмим бо ҳадафи "мубориза бо ҷинояткорӣ" рӯйи даст гирифта шудааст.

Ҳамчунин, зикр карданд, ки бархеҳо тариқи ин паёмрасонҳо метавонистанд одамонро ба гурӯҳҳои мамнуъ ҷалб кунанд, маводи нашъаовар фурӯшанд ва маълумоти манъшударо нашру паҳн  созанд.

 

Акнун чӣ гуна метавон занг зад?

Ҳозир барои идомаи гуфтугӯ чанд восита мавҷуд аст:

- Истифодаи паёмрасонҳо, вале насби филтиршикан ё ба қавле VPN барои зангҳои бемушкил;

- Гузаштан ба замимаҳои алтернативӣ, ки то ҳол бидуни маҳдудият кор мекунанд;

- Истифодаи алоқаи маъмулӣ - занг тариқи телефон ё паёмак (SMS).

 

Ба кадом замима ё паёмрасон гузарем?

Бо вуҷуди писандидатарин боқӣ мондани паёмрасонҳои "WhatsApp" ва "Telegram" барои гуфтугӯ, онҳо ягона нестанд. Пойгоҳи "Медуза” рӯйхати хадамотеро нашр кард, ки метавонанд ҷойгузини хуби ин паёмрасонҳо бошанд.

Дар ҳамин ҳол, операторни мобилии Тоҷикистон ҳам чанд замимаи алоҳидаро барои тамос бо кишварҳои хориҷа, махсусан Русия пешниҳод мекунанд, ки муҳоҷирони кории тоҷик метавонанд бо истифода аз онҳо бо наздиконашон дар тамос шаванд.

Акси марбута аз ТАСС

 

Чӣ гуна дар Русия ҳузур дошта, аз ин замимаҳо истифода бурд?

Барои бисёре аз ин замимаҳо доштани симкорти ҳамон ширкате лозим аст, ки шумо аз замимаи он истифода мебаред. Танҳо "МегаФон Life" истисно аст.

 

"MobiГап" аз "Babilon-Mobile"

Ин замима ба занги ройгон ва гуфтугӯ тариқи видео бо дигар корбарони "MobiГап" имкон фароҳам меорад. Агар ба рақамҳои одии Тоҷикистон занг занед, таърифаҳо (тарифҳо) хеле пастанд: наздики 10 дирам барои 1 дақиқа дар дохили шабака ва каме зиёдтар ба дигар операторон.

Замима бо забонҳои тоҷикӣ, русӣ ва англисӣ кор мекунад, вале барои бақайдгирӣ симкорти "Babilon-Mobile" лозим аст.  

 

"Чӣ Гап?" аз "Tcell"

Воситаи қулайи дигар замимаи "Чӣ Гап?" аст. Тариқи он метавон дар дохили замима бепул занг зад,  вале 1 дақиқаи зангҳо ба рақамҳои "Tcell" тақрибан 10 дирам ва ба дигар операторон ҳудуди 12 дирам аст.

Бақайдгирӣ танҳо ба воситаи симкорти "Tcell" имконпазир буда, сифати зангҳо маъмулан хуб аст.

 

"Салом" аз "ZET-Mobile"

"Салом" ба гуфтугӯи ройгон байни корбарони замима имкон медиҳад. Зангҳо ба рақамҳо дар дохили шабака ҳудуди 10 дирам ва ба дигар шабакаҳо  18 дирам нарх доранд.

Замима миёни муҳоҷирони тоҷик дар Русия, Туркия, ИМА ва Олмон маъруфу писандида аст. Агар мехоҳед, ки тез-тез ба хона занг занеду алоқа усутвор бошад, истифодаи он бароҳат аст.

 

"МегаФон Life" бо ҳама симкортҳо кор мекунад

"МегаФон Life" ҳатто бо симкортҳои дигар операторони Тоҷикистон кор мекунад, ҳарчанд корбурди комили он аз ҳама бештар барои муштариёни "MegaFon" дастрас аст. Дар дохили замима зангҳо ройгон буда, инчунин корбурдҳо (функсияҳо)-и иловагӣ низ дастрасанд: интиқол, кэшбэк ва идораи таърифаҳо. Ин барои касоне, ки ҳамаашро дар як замима дидан мехоҳанд, бароҳат аст.

 

Чанд маслиҳат барои муҳоҷирон

- Агар наздикону пайвандонатон дар Тоҷикистон қарор доранд, пас замимаи оператори худатонро истифода баред. Ин арзонтар ва қулайтар аст;

- Агар наздикону пайвандонатон дар Русия зиндагӣ кунанду симкорти Русия дошта бошанд, пас симкорти Тоҷикистон харидан беҳтар аст;

-Гузинаи ҳамагонӣ (универсалӣ) ва беҳтар "МегаФон Life" аст. Он бо ҳама гуна симкорт кор карда, зангу интиқол ва идоракунии таърифаҳоро дар бар мегирад.

Дар Telegram, Facebook ва Instagram бо мо бимонед.