Мактаби рақами 67-и деҳаи Чоряккорони ноҳияи Рӯдакиро ба номи Ҳомид Маҷидов, забошиноси номошнои тоҷик гузоштанд. Дар ин бора духтари ин донишманди тоҷик ба "Азия-Плюс" хабар дод.

Ба гуфтаи ӯ, маросими номгузории мактаб имрӯз бо иштироки пайвандони  Ҳомид Маҷидов ва намояндагони ҳукумати ноҳияи Рӯдакӣ ва бахши маориф сурат гирифтааст.

Қарори номгузории мактаби рақами 67-и ноҳия ба номи забоншинос Ҳамид Маҷидов аз ҷониби Маҷлиси вакилони халқи ноҳияи Рӯдаки 30-юми сентябри соли 2024 содир шуда буд.

Ҳомид Маҷидов, профессор ва забоншиноси маъруфи тоҷик шаби  20 июни соли 2022 дар синни 85 солагӣ даргузашта буд.

Ӯ 15 июни 1937 дар ноҳияи Рӯдакӣ таваллуд шудааст. Хатмкардаи Донишгоҳи миллии Тоҷикистон (1961), аспирантура (1967) ва докторантураи он (1983) буда, аз соли 1961 дар ҳамин донишгоҳ ба фаъолияти омӯзгорӣ пардохтааст: Ассистент (1961-1964), муаллими калон (1967-1973), дотсент (1974-1995) ва аз соли 1996 профессори кафедраи забони муосири тоҷик.

Солҳои 1985-1988 ноиби ректори Донишкадаи омӯзгории забон ва адабиёти рус (ҳоло Донишгоҳи байналмиллалии Тоҷикистон ба номи Сотим Улуғзода) оид ба таълим буд. Солҳои 2002-2005 вазифаи мудири кафедраи забони муосири тоҷики Донишгоҳи миллии Тоҷикистонро ба уҳда дошт.

Дар Telegram, Facebook ва Instagram бо мо бимонед.