Тибқи маълумоти пешакии Тадқиқоти демографӣ ва солимии Ҷумҳурии Тоҷикистон давоми соли 2023 дар кишвар 16 дарсад занони издивоҷкарда ба ягон намуди хушунати гендерӣ рӯбарӯ шудаанд. Ин нишондиҳанда нисбат ба ҳафт соли пеш 15 дарсад коҳиш ёфтааст.

Дар ин бора Дилрабо Мансурӣ, муовини сарвазири Тоҷикистон зимни баргузории мизи мудавваре бахшида ба ҷамъбасти маъракаи “16 рӯзи алайҳи хушунати гендерӣ” иттилоъ дод, менависад дафтари Созмони Милали Муттаҳид дар Ҷумҳурии Тоҷикистон дар иттилоияе, ки ба “Азия-Плюс” ирсол намуд.

“Ин пешравии назаррас натиҷаи фаъолияти муштараки мост. Шарикии пайвастаи мо барои таъмини сармоягузории ҳамаҷониба дар баробарии гендерӣ, солимии репродуктивӣ ва ҳуқуқҳо метавонад ҳаёти занон ва духтаронро беҳтар гардонад ва рӯзномаи муштараки рушди моро пеш барад”, - зикр намудааст Дилрабо Мансурӣ.

Дар ин мизи мудаввар чаҳор самти асосии мусоидат ба баробарии гендерӣ ва пешгирии хушунати гендерӣ, аз ҷумла, муҳити ҳуқуқӣ, дастрасӣ ба хизматрасониҳои муҳим барои натоҷёфтагони хушунати гендерӣ, ҳалли меъёрҳои зараровари иҷтимоӣ ва тавонмандсозии иқтисодии занон барои баробарии гендерӣ ва коҳиши камбизоатӣ баррасӣ гардидааст.

Парвати Рамасвамӣ

Парвати Рамасвамӣ, ҳамоҳангсози доимии СММ дар Тоҷикистон зикр кардааст, ки “СММ ӯҳдадор аст, то соли 2030 ҳама шаклҳои хушунат зидди занону духтарон ва дигар амалҳои зарароварро қатъ кунад.

“Маъракаи “16 рӯзи фаъолият бар зидди хушунати гендерӣ” ҳар сол имконияти муҳимеро фароҳам меорад ва зарурати фаврии амал барои хотимаи хушунати гендериро таъкид мекунад”,- гуфтааст намояндаи СММ.

Кэтрин Смиттон, сафири Британияи Кабир дар Тоҷикистон таъкид кардааст, ки “мубориза бо хушунати гендерӣ бояд ҳамешагӣ бошад - аз ин рӯ, дар ҳоле ки 16 рӯзи амал мушкилотро таъкид мекунад, ҳалли он саъю кӯшиши устувор, ӯҳдадорӣ ва амали дастаҷамъиро 365 рӯз дар як сол талаб мекунад”.

Бояд гуфт, ки “16 рӯзи амал зидди хушунати гендерӣ”, як маъракаи умумиҷаҳонӣ мебошад, ки аз ҷониби Созмони Милали Муттаҳид амалӣ мегардад. Гуфта мешавад, ки ҳадафи маъракаи мазкур баланд бардоштани сатҳи огоҳии шаҳрвандон ҷиҳати кам кардани зӯроварӣ нисбати занон ва духтарон мебошад. Ин маърака ҳар сол  аз 25-уми ноябр то 10-уми декабр идома мекунад.

Дар Telegram, Facebook ва Instagram бо мо бимонед