Аз Вазорати фарҳанг гуфтанд, ки дар кишвар дастурамали тавсиявии либосҳои миллии мардона ва занона омода кардаанд, ки аз 16 боб иборат аст ва ба зудӣ нашру дастраси аҳолӣ мешавад.

Хуршед Низомӣ, сардори Раёсати рушди муассисаҳои фарҳангӣ-фароғатӣ ва ҳунарҳои мардумии вазорат ва таҳиягари ин китоб дар нишатси матбуотии имрӯза, 27-уми январ гуфт, ин дастурамал танҳо характери тавсиявӣ дорад.

Ӯ афзуд, ки дар ин китоб пӯшидани либос дар кӯча, дар рӯзҳои истироҳатӣ ва дар ҷашну маросим тавсия мешавад.

Бояд гуфт, ки манъи воридот, фурӯш, тарғиби либосҳои ба фарҳанги миллӣ бегона, инчунин, дар ҷойҳои ҷамъиятӣ пӯшидани чунин либосҳо соли гузашта баҳсҳои зиёдро ба бор оварда буд.

Ин маҳдудият ҳам моҳи майи соли 2024 дар асоси моддаи 18-и Қонун “Дар бораи танзими ҷашну маросим дар Ҷумҳурии Тоҷикистон” расман ҷорӣ шуд, вале масъулин истилоҳи “либоси бегона”-ро ба таври гуногун шарҳ доданд.

Пештар аз ин, вазири пешини фарҳанг Зулфия Давлатзода гуфта буд, дар мавриди дастурамали либосҳои тавсиявии мардони Тоҷикистон кор бурда истодаанд. Он ба куҷо расид маълум нест.

 

Фаъолияти блогерон тибқи қонун ба танзим медарояд

Ҳамчунин, дар нишаст Матлубахон Сатториён, вазири фарҳанг дар посух ба саволи “Азия-Плюс” гуфт, барои ба танзим даровардани фаъолияти блогерон дар сатҳи қонун чораандешӣ мекунанд.

Ба гуфтаи вазир, ҳоло ба як қатор қонунҳои кишвар, ба вижа ба қонун “Дар бораи матбуот ва дигар воситаҳои ахбори омма” барои танзими фаъолияти блогерон тағйирот пешбинӣ шудааст.

Матлубахон Сатториён
Акс аз "Азия-Плюс"

Ба қавли Сатториён, мутахассисон талош доранд, ки фаъолияти блогеронро ба таври қонунӣ ба танзим дароваранд.

“Ҳамчунин, барои баланд бардоштани саводи расонаӣ ва баланд бардоштани савияи фарҳангии ҷомеа як қатор чораҳо андешида шуда истодааст. Фаҳми ҷомеа ҳам баланд шавад, худ аз худ муҳтавои паст ҳам аз байн меравад”, - илова кард вазири фарҳанг.

 

 “Фишанг” барои танзими фаъолияти сарояндагон

Дар идомаи нишаст, Давлат Сафар, муовини вазири фарҳанг гуфт, барои ба танзим даровардани фаъолияти овозхононе, ки дар дастаҳои ҳунарӣ кор намекунанд, мустақилона тарона таҳия мекунанд ва аз беруни кишвар дар фазои тоҷикӣ ба нашр мерасонанд, “фишанге таҳия шуда истодааст”.

Давлат Сафар аз тарафи чап
Акс аз "Азия-Плюс"
Ба қавли ӯ, ин фишанг “садди роҳи бенизомӣ дар таҳияи суруди мусиқӣ мешавад”. Вале ӯ дақиқ дар бораи ин “фишанг” шарҳе надод.

Бояд гуфт, ки чанд соли охир аҳли зиё ва фарҳангиёни тоҷик аз фаъолияти бенизоми блогерон ва сатҳи пасти сурудаҳои овозхонони ҷавони тоҷик нигаронӣ доранд ва аз масъулин хостори ба танзим даровардани ин вазъ шудаанд.

Дар нишасти матбуотии имрӯзаи вазорати фарҳанг боз кадом масъалаҳо баррасӣ шуд, дар ин гузориш хонед.  

Дар Telegram, Facebook ва Instagram бо мо бимонед.