Соли гузашта додгоҳҳои Русия теъдоди рекордии хориҷиён - қариб 90 ҳазор нафарро иҷборан ихроҷ кардаанд. Дар ин бора хабаргузории ТАСС бо такя ба Дмитрий Арестов, директори Хадамоти федералии судиҷрочиёни Русия хабар додааст.

“Соли 2024 зиёда аз 87 ҳазор шаҳрванди хориҷӣ ва шахсони бешаҳрвандӣ  аз ҳудуди Русия ба 66 кишвари хориҷӣ ихроҷ карда шуданд, ки қариб 2 баробар зиёдтар нисбат ба соли 2023 (он замон 44 ҳазор нафар ба 60 кишвар) аст”, - гуфтааст ӯ.

Қисми зиёди хориҷиён маҷбурӣ ва аксаран ба кишварҳои ИДМ Озарбойҷон, Беларус, Қирғизистон, Молдова, Тоҷикистон, Туркманистон, Ӯзбекистон ихроҷ шудаанд. Илова бар ин, қисме ба Куба, Ветнам, Судон, Чин, Миср ва дигар кишварҳо ихроҷ шудаанд.

Дар Хадамот аз як маврид мисол овардаанд, ки дар он 6 зани шаҳрванди Нигерия, ки ба фоҳишагӣ машғул буданд, аз вилоятҳои Свердловск, Саратов ва Тюмен хориҷ карда шуданд.

Қаблан хабар дода шуда буд, ки дар соли гузашта иҷрочиёни додгоҳҳо аз Маскав 18 ҳазор, аз Санкт-Петербург - 8 ҳазор, аз вилояти Маскав - 5,2 ҳазор ва аз минтақаи Краснодар - 2,2 ҳазор хориҷиро ихроҷ кардаанд.

Додситони кулли Тоҷикистон Ҳабибулло Воҳидзода зимни нишасти матбуотии рӯзи 14 феврал дар Душанбе изҳор намуд, ки теъдоди шаҳрвандони Тоҷикистон, ки соли гузашта аз Русия ихроҷ шудаанд, то 30 ҳазор нафар расид. Мавридҳои хеле зиёд шудани ихроҷ пас аз амали террористӣ дар “Крокус Сити Холл” рӯзи 22 марти соли 2024 оғоз шуд.

Дар Telegram, Facebook ва Instagram бо мо бимонед.