Дар Агентии суғуртаи иҷтимоӣ ва нафақа Маркази тамос ба фаъолият оғоз карда, рақами кутоҳи 3900 барои хидматрасонӣ ба нафақагирон фаъол гардонида шуд. Дар ин бора Агентии суғурта ва нафақаи кишвар иттилоъ дода навиштааст, ин марказ рӯзи 25-уми июн ба истифода дода шуд ва акнун шаҳрвандон метавонанд ба саволҳои худ дар робита ба нафақа посух гиранд.

Манбаъ навиштааст, муроҷиати шаҳрвандон аз тамоми манотиқи кишвар имконпазир буда, сокинон метавонанд ба суолҳои худ дар бораи пешниҳоди ҳуҷҷатҳои зарурӣ барои таъини нафақа аз рӯйи маъюбӣ, синну сол ва бесаробонӣ, идомаи фаъолияти меҳнатӣ пас аз таъин гардидани нафақа, пешниҳоди ҳуҷҷат барои бозҳисобии нафақа ва дигар масоили марбут посухи мушаххас гиранд.

Ба навиштаи ин ниҳод, Маркази тамос ба хотири вусъати рақамикунонии хидматрасониҳои давлатӣ таъсис ёфтааст.

“Ин Марказ бо мақсади баланд бардоштани самаранокии хидматрасонӣ ва қонеъ гардонидани талаботи шаҳрвандон дар самти хизматрасонӣ дар соҳаи суғуртаи иҷтимоӣ ва нафақа мебошад”,- гуфтааст Абдураҳмон Ҳалимзод,  директори Агентии нафақа зимни ифтитоҳи марказ.

Ба иттилои Агентӣ, аз моҳи марти соли ҷорӣ Барномаи “Феҳристи ягонаи давлатии нафақагирон” таҳия шуда, аллакай дар шаҳри Душанбе, вилояти Хатлон ва шаҳру ноҳияҳои Роғун, Ваҳдат, Ҳисор, Турсунзода, Рӯдакӣ, Варзоб, Шаҳринав ва ноҳияи Файзобод фаъол аст.

Гуфта мешавад, ки тавассути ин барнома пардохти мутамаркази нафақа ба таври автоматӣ тавассути “Амонатбонк” имконпазир мегардад.

Интизор меравад, ки то моҳи сентябри соли 2025 тамоми шаҳру навоҳии ҷумҳурӣ ба пардохти автоматикунонии нафақа пайваст мегардад.

Ёдрас мешавем, ки баъди ба пардохти ғайринақдӣ гузаштани тамоми хидматрасониҳои давлатӣ пардохти нафақа низ ғайринақдӣ гардид. Тибқи қарори ҳукумати кишвар, интизор меравад, ки то охири соли 2025 пардохтҳои ғайринақдӣ дар соҳаҳои буҷетӣ ва хидматрасониҳои давлатӣ пурра таъмин карда мешавад.

Дар Telegram, Facebook ва Instagram бо мо бимонед.