Имзои созишнома дар бораи муоинаи тиббии шаҳрвандони Тоҷикистон, ки дирӯз, 9-уми октябр дар доираи сафари давлатии Владимир Путин, президенти Русия ба Тоҷикистон байни вазоратҳои тандурустии ду кишвар ба имзо расид, имкон медиҳад, шаҳрвандони Тоҷикистон пеш аз сафар ба Русия дар Душанбе аз муоинаи тиббӣ гузаранд.

Қаблан, муҳоҷирон дар Русия аз муоина мегузаштанд, ки ҳам сарсонии зиёд дар пай дошт ва ҳам аксаран бо баҳонаи мубталои бемориҳои сироятӣ аз ин кишвар бозпас мегардониданд. 

Тасдиқи санади аз муоинаи тиббӣ гузаштан тибқи қоидаҳои муқаррарнамуда аз ҷониби Русия сурат мегирад.

Созишномаро вазири тандурустӣ ва ҳифзи иҷтимоии аҳолии Тоҷикистон Ҷамолиддин Абдуллозода ва вазири тундарустии Русия Михаил Мурашко имзо карданд
Акс аз хадамоти матбуоти президенти ҶТ

Алексей Кузнетсов, ёвари вазири тандурустии Русия ба РИА Новости гуфтааст, ки "дар доираи созишнома шаҳрвандони Тоҷикистон, ки барои кор ба Русия мераванд, метавонанд дар нуқтаи махсуси таъсиёфта дар яке аз муассисаҳои тиббии Душанбе, аз муоинаи тиббии ҳатмӣ гузаранд".

Ба таъкиди вай, гузаштан аз муоинаи тиббӣ пулакӣ аст, вале то ҳол ҳаҷми маблағи он маълум нест.

дигар ҷузъиёти ин созишнома ҳоло маълум нест.

ҳамчунин, дирӯз, 9-уми октябр, вазирони меҳнат, муҳоҷирати Тоҷикистон ва Русия дар бораи ворид намудани тағйирот ба сафарбарии муташаккилонаи шаҳрвандони Тоҷикистон, ки соли 2019 қабул шуда буд, протокол табодул карданд Ба ин санад чӣ тағйирот ворид шудааст, ҳоло маълум нест.

Вазирони корҳои дохили Тоҷикистон ва Русия як санади дигар - дар мавриди “мақоми ҳуқуқии намояндагиҳои мақомоти салоҳиятдор оид ба масъалаҳои корҳои дохилӣ ва муҳоҷират” ба имзо расониданд, ки он ҳам ба муҳоҷират рабт дошт. Ҷузъиёти ин санад ҳам то ҳол маълум нест.

Бодя гуфт, ки рӯзи 9 октябр аз рӯйи натиҷаҳои гуфтушунид дар сатҳи олӣ байни Тоҷикистон ва Русия дар маҷмуъ, 16 санад ба имзо расид.

Зимни суханронӣ дар конфронси матбуотӣ аз рӯйи натиҷаҳои гуфтушунид Владимир Путин, раисҷумҳури Русия  бори дигар зикр кард, ки беш аз 1 млн нафар шаҳрвандони Тоҷикистон дар Русия кор мекунанд. Оморе, ки мақомоти Тоҷикистон ҳамеша ба чолиш кашида, таъкид кардааст, ки теъдоди муҳоҷирони тоҷик дар Русия атрофи 600 ҳазор аст.

Дар Telegram, Facebook ва Instagram бо мо бимонед.